Tiranë, 10 maj NOA - Presidenti i Republikës Bamir Topi me rastin e Ditës së Drejtësisë, ka organizuar sot në Pallatin e Brigadave një takim me prokurorë, gjyqtarë, përfaqësues të tjerë të drejtësisë si dhe me ambasadorë të akredituar në Tiranë.
Kreu i Shtetit gjatë fjalës së tij u shpreh se sistemi i drejtësisë duhet të mos shkëputet nga drejtësia.
Në ditën e 96 vjetorit të krijimit të sistemit të drejtësisë në vendin tone, presidenti Topi, apeloi për pavarësi të institucioneve të drejtësisë.
"Sot nuk është e lehtë të bësh drejtësi. Politika të mos ndërhyjë", u shpreh gjatë fjalës së tij kreu i shtetit.
"Të jeni të pavarur. Para drejtësisë të gjithë të barabartë", shtoi me tej presidenti.
Sipas tij pavarësisht debateve dhe përplasjes mes institucioneve, drejtësia mbi të gjitha duhet të jetë objektive. "Drejtësia e mirë bën politikë të mirë" deklaroi Topi duke shtuar se "synimi kryesor është arritja e standarteve evropiane në drejtësi.
"Pronat, korrupsioni, kriminaliteti, janë problem i vazhdueshëm për drejtësinë" tha më tej presidenti duke u kërkuar prokurorëve dhe gjyqtarëve të tregohen të pavarur përpara sfidave.
k.k/NOA
