Istog, 2 qershor NOA - Një 29-vjeçare, ka pësuar plagë të rënda trupore nga therja me thikë, që dyshohet se ia ka shkaktuar vëllai i saj i moshës 31-vjeçare.
Zëdhënësi i policisë rajonale në Pejë, Avni Gjevukaj, konfirmoi të martën se ngjarja ka ndodhur në fshatin Vrellë të Komunës së Istogut.
Në vendin e ngjarjes, sipas zëdhënësit, policia ka konfirmuar informatën e mbërritur përmes telefonit në sallën operative, se 31-vjeçari e kishte therur me thikë motrën e vet.
Në gjendje kritike për jetën, 29-vjeçarja është dërguar nga familjarët në Spitalin e Pejës, nga ku ajo pastaj për shkak të gjendjes së rëndë, është transferuar për trajtim të mëtejshëm mjekësor në Qendrën Klinike Universitare në Prishtinë.
Motivet që e kanë shtyrë 29 vjeçarin të kryejë këtë krim brenda familjes, zyrtarisht, sipas policisë ende nuk dihen.
Por, burime brenda organeve të rendit të cituara nga "Express", thonë se i dyshuari në deklaratën e tij ka thënë se, ai ka pasur presione dhe keqtrajtime psikike nga e motra, dhe s'ka mundur të durojë më këtë situatë të krijuar brenda familjes.
a.b/NOA
