Gjirokastër, 11 qershor, NOA - Dy kandidatet e Partisë Socialiste për qarkun e Gjirokastrës, Arta Dade dhe Elvira Shapllo, kanë zhvilluar takime me tregtarët e vegjël në tregun e fruta-perimeve në qytetin e Gjirokastrës, me paraplegjikët dhe gratë gjirokastrite.
Në takimin me këto të fundit, gratë e tubuara që në fillim kanë shprehur qartë dhe hapur mbështetjen ndaj PS-së dhe kandidateve femra të PS-së që konkurrojnë në qarkun e Gjirokastrës.
"Ne duhet të ndryshojmë Shqipërinë dhe kjo arrihet po të jemi bashkë", - është shprehur kandidatja për deputete Elvira Shapllo.
Ndërsa kryesuesja e qarkut të Gjirokastrës, Arta Dade, ka falënderuar gratë për mbështetjen e treguar dhe ka kërkuar angazhim më të madh të tyre në politikë pasi kjo është edhe deviza e PS-së, që të legjitimojë pjesëmarrjen e gruas në forume partiake në përqindje të barabartë me burrat.
"Kjo, - është shprehur Dade, - është bërë realitet pasi në mjaft qarqe listat e kandidatëve për deputetë i kryesojnë grate".
Më pas, ajo është ndalur në problematikat me të cilat ndeshet gruaja shqiptare gjatë ditëve të sotme dhe për këtë ajo ka kërkuar angazhimin e tyre në jetën e përditshme për të ndryshuar siç tha ajo këtë realitet.
n.e/NOA
