Tiranë, 2 Korrik NOAÂ Fotot Updated - Disa dhjetëra makina u zhdukën nën ujë në vendparkime të Tiranës, pemë janë shkulur dhe banesa e dyqane kanë pësuar dëme si pasojë e një tufani që përfshiu vendin pasditen e sotme kryeqytetin dhe pjesën tjetër të vendit.
Pas reve të mëdha që u grumbulluan ulët në qiellin e kryeqytetit, aty nga ora 15.00, pak minuta më vonë ka nisur një rrebesh që shumë qytetarë e cilësuan si tufan.
Era e fortë bënte që shiu të shndërrohej në shtrëngatë, kurse breshëri po ashtu bënte të vetën duke iu shtuar furtunës.
Në këto kushte, katet e para pësuan përmbytje thuajse të gjitha.
Parkimet nëntokësore po ashtu u përmbytën duke dëmtuar shumë automjete.
Rasti tipik, është ai që gjeni në fotot që shoqërojnë këtë shkrim dhe të tjera që i gjeni te rubrika GALERIA e faqes së NOA, ku në parkimin privat ngjitur me ETC, u përmbytën të gjitha makinat që gjendeshin aty.
Pronarët e automjeteve që kishin parkuar në parkimin privat pranë European Trade Center (ETC), u tmerruan nga pamjet e rralla dhe shumë prej tyre kanë konstatuar se depërtimi i ujit në pjesët motorike i ka nxjerrë jashtë përdorimit makinat e tyre, pjesa më e madhe cilësore dhe të shtrenjta.
Një shofer i cili më kot po përpiqej të nxirrte makinën e tij nga vendparkimi, ku mezi duket antena sipër mjetit, pohoi për agjencinë e lajmeve NOA se as që bëhet fjalë për dëmshpërblim.
Përkundrazi, pohon shoferi, punëtorët e parkimit po kujdesen që çdo makinë që arrin të dalë nga thellësia e ujit, të paguajë më parë orët e qëndrimit (100 lekë ora), dhe më tej të vazhdojë rrugën, qoftë dhe i tërhequr nga karrotresët.
e.l/NOA
