Shkup, 3 korrik, NOA - Me vendim të Ministrisë Arsimit dhe Shkencës janë shkarkuar anëtarët e Senatit të Universitetit Shtetëror të Tetovës (USHT) dhe udhëheqësia aktuale e drejtuar nga rektori prof.dr Agim Vela.
Ndërhyrja e ministrisë është vlerësuar nga udhëheqësia aktuale dhe Senati si shkelje e rëndë e autonomisë së universitetit. Ushtrues të ri të detyrës së rektorit është caktuar prof.dr. Agron Reka.
Ministria e Arsimit dhe Shkencës ka bërë të ditur se ka marrë këtë vendim në bazë të Ligjit për arsimin e lartë dhe në përputhje me konkluzionet e Parlamentit të Maqedonisë lidhur me parregullësitë në USHT.
Rektori Agim Vela dhe shërbimet e universitetit kanë njoftuar përfaqësuesit e bashkësisë ndërkombëtare për shkeljet e bëra.
Ndërhyrja ka ndodhur në momentin kur në USHT po zhvillohej procedura e konkurrimit të kandidatëve për rektor të ri të universitetit, pas zgjedhjes së ish-rektorit Sadi Bexheti në krye të komunës së Tetovës në zgjedhjet e fundit. Agim Vela dy muaj më parë u zgjodh ushtrues detyre i rektorit të USHT-së deri në zgjedhjet e reja për rektor që tashmë kishin nisur në këtë universitet.
