Tiranë, 18 Korrik NOA - Njësia e Mbikëqyrjes së Lojërave të fatit, gjatë një aksioni ka bllokuar mesditën e së Premtes, kazinonë e vetme në Shqipëri, Regency Casino, pranë kompleksit Tajvan në kryeqytet, raporton Tv Klan.
Mungesa e certifikimit dhe përmbushjes së standardeve të reja, për këto lojëra, që cënojnë portofolin e lojtarëve që marrin pjesë në to, kanë detyruar inspektorët e njësisë së mbikëqyrjes së lojërave të fatit të plotësojnë procesverbalet.
Ata kanë rrethuar me shirita të kuq 75 makineri elektronike të kësaj kazinoje, duke i nxjerrë kështu ato përfundimisht nga përdorimi. Specialistë nga kjo njësi mbikëqyrëse, sqarojnë se në 15 korrik të këtij viti, skadoi edhe afati 6 mujor gjatë të cilit sipas ligjit të ri për këtë lloj aktiviteti, duhej të përfundonte certifikimi i të gjitha makinerive elektronike në kazino apo në sallat e lojërave të fatit në të gjithë vendin.
Por aktualisht janë certifikuar vetëm 3 mijë makineri elektronike, ndërkohë që në të gjithë vendin, ka rreth 6 mijë të tilla.
Pra gjysma e makinerive elektronike ekzistuese është jashtë parametrave të kërkuara dhe me ligj, duhet të dalin nga qarkullimi.
Për këtë qëllim njësia mbikëqyrëse e lojërave të fatit ka nisur një aksion të gjerë në shkallë vendi, për bllokimin dhe më pas shkatërrimin e makinerive të padeklaruara apo që nuk përmbushin standardet. Makineritë elektronike që u shkatërruan, ishin sekuestruar vetëm dy ditët e fundit në Tiranë dhe Shkodër.
Specialistët e njësisë mbikëqyrëse sqarojnë se certifikimi i makinerive elektronike ka të bëjë me një sërë kushtesh teknike, të cilat mbi të gjitha i ofrojnë lojtarit mbrojte maksimale, ndaj çdo forme të abuzivizmit nga pronari i makinerive.
