Korçë, 27 Korrik NOA - Banorë të rajonit të Korçës po vazhdojnë me ritme intensive kultivimin e hashashit në përpjekje për të nxjerrë fitime në rrugë të pandershme.
Njëkohësisht, policia e sektorit antidrogë në drejtorinë rajonale policore të Korçës, thotë se po bën përpjekje për të zbuluar dhe asgjësuar fushat e mbjella me hashash.
Gjatë ditës së sotme, janë zbuluar edhe dy parcela të mëdha që i shihni në fotot që shoqërojnë këtë raport.
Fushat e mbjella me bimën narkotike të hashashit, u zbuluan në sajë të një operacioni që erdhi pas sinjaleve në rrugë operative, në fshatin Mazrek të komunës Lekas në Korçë.
Policia pasi mbërriti në vendin ku kultivohej droga, konstatoi 1 069 bimë hashashi të cilat i asgjësoi në vend përmes djegies.
Ndërkohë, konfirmohet se është bërë dhe ndalimi i 42-vjeçarit, Luan Gishto, lindur në fshatin Mazrek të Korçës dhe banues në Fier-Shegan të Lushnjës.
Ai përballet tani me akuzën e kultivimit të bimëve narkotike. Prej kohësh, Gishto ishte larguar nga Korça dhe jetonte në zonën e Myzeqesë, por rajonin juglindor e shihte si "vezën e artë" për të nxjerrë fitime derisa u zbulua nga antidroga.
/a.f/e.l/NOA/
