Tiranë, 8 gusht NOA - Kryetarja e Kuvendit, Jozefina Topalli ka marrë pjesë sot në homazhet e kryera në nderim të katër punonjësve të policisë së vrarë dje gjatë një operacioni për kapjen e shumë të kërkuarit Dritan Dajtit në Durrës.
Pas homazheve Topalli ka thënë për mediat se "Sot gjithë Shqipëria nderon katër djemtë e saj efektiva të Policisë së Shtetit. Fatos Xhani, Sajmir Duckollari, Altin Dizdari, Kastriot Feska janë herojt tonë. Shqiptarët sot mbajnë frymën, Shqipëria ka humbur katër djemtë e saj, Policia e Shtetit ka humbur punonjësit e saj që ishin modeli moral. Familjet e tyre, djemtë, babanë, bashkëshortët e tyre të dashur, trima, kurajoz". "Në këto momente të vështira, ne të gjithë shprehim ngushëllimet për familjet e tyre, mbështetjen, solidaritetin me Policinë e Shtetit, që tregoj edhe një herë vullnetin por dhe dëshmoi sakrificën në luftën kundër krimit" tha më tej Topalli.
Ajo mori pjesë edhe në ceremoninë mortore të katër policëve në Varrezat e Dëshmorëve.
k.k/NOA
