Vlorë, 29 Gusht NOA - Dy persona të cilët ishin identifikuar si skafistë që dërgonin drogë në vendet fqinje përmes detit, janë arrestuar natën duke gdhirë dita e Shtunë.
Operacioni i posaçëm i organizuar nga forcat e Policisë Kufitare dhe të Rendit të Qarkut Vlore u krye në bashkëpunim me Drejtorinë Kundër Krimit të Organizuar në Policinë e Shtetit, informon korrespondenti i agjencisë së lajmeve NOA.
Persona te arrestuar, janë Roland Lulaj, 29 vjeç dhe Ardian Gockaj, 38 vjeç, që të dy, lindur dhe banues në Vlorë.
"Ndalimi i tyre është bërë në funksion të procedimit penal nr. 82, viti 2008 të Prokurorisë për Krime të Rënda, Tiranë", - tha zyrtarisht Policia e Shtetit e cila sqaroi se "Gockaj dhe Lulaj, janë nën akuzë për trafik lëndësh narkotike në bashkëpunim.
Gjate ndalimit të dy skafistëve, me cilësinë e provës materiale iu gjetën dhe sekuestruan një motoskaf me gjatësi 5.5 metra, dy motorë mjeti lundrues me fuqi 40 HP - Merkuri dhe 9 HP - Merkuri, katër aparate telefonik celular si dhe shuma prej 1 850 euro.
"Vepra penale për të çilen u krye ndalimi i këtyre shtetasve është "Trafikimi i lëndëve narkotike e kryer në bashkëpunim", - sqaroi policia, e cila theksoi se ekzekutoi urdhrat e ndalimit prerë që vitin e kaluar, nga Prokuroria për Krime të Rënda.
/a.d/e.n/NOA/
