Tiranë, 25 tetor NOA-Drejtoria e Përgjithshme e Tatimeve ka deklaruar sot se bllokimi i depove të nënprodukteve të naftës të kompanisë "Armo" është ligjore.
Sipas zyrës së shtypit të Tatimeve thuhet se ky veprim u krye në bazë të një urdhri bllokimi i lëshuar nga Drejtoria Rajonale e Tatimpaguesve të Mëdhenj.
"Tatimpaguesi "ARMO" sh.a nuk është i pajisur me autorizim si tatimpagues akcizë si dhe nuk ka miratim të magazinave tatimore sipas kërkesave që përcakton ky Ligj", thuhet në deklaratën e Tatimeve.
Më pas deklarata vijon duke treguar se "ARMO" gjithashtu nuk ka plotësuar detyrimin ligjor si tatimpagues akcize për vendosjen e matësve në të gjitha pikat e hyrjes, përpunimit dhe daljes së lëndëve të para, prodhimit gjysmë të gatshëm dhe atij të gatshëm.
"Kërkesat e herë pas hershme të administratës tatimore për plotësimin e këtyre detyrimeve ligjore nga ana e këtij tatimpaguesi nuk janë marrë parasysh që prej Dhjetorit 2008", shpjegon drejtoria e Përgjithshme e Tatimeve.
Kjo drejtori thekson se "Armo" prej shumë kohësh vazhdon të mos plotësojë dokumentacionin e duhur ligjor, duke çuar në bllokimin sot të depove të nënprodukteve të naftës ashtu siç ndodhi dhe në Maj 2009.
m.i/NOA
