Kamëz, 12 nëntor, NOA - Ka nisur sot nga zbatimi vendimi i mbrëmshëm të komunikuar nga ministria e Arsimit dhe Shkencës për lejimin e regjistrimit të studentëve grevistë të universitetit Bujqësor të Kamzës në nivelin e Diplomave të Nivelit të Dytë.
Situata në mjediset e këtij universitetit sot në mëngjes paraqitet e qetë, ndryshe nga një ditë më parë kur studentët pushtuan derën e tij dhe bojkotuan mësimin, duke provokuar edhe ndërhyrjen e forcave policore për të stabilizuar situatën.
Madje studentët grevistë, të cilët tashmë e kanë ndërprerë atë, pohojnë se figurojnë të regjistruar në nivelin DND.
Por nga vendimi i qeverisë duket se nuk kanë mbetur që të gjithë të kënaqur. Madje ka patur reagime të hapura nga dekanati, konkretisht nga zv/dekani Meço, sipas të cilit ai nuk bën një gjetur veçse e çon fakultetin në kolaps.
"Do të shkelim cilësinë e nivelit të parë dhe vendimi është teknikisht i pazbatueshëm", mësohet të jetë shprehur ai lidhur me një fakt të tillë.
Dje në orët e mbrëmjes, ministria e Arsimit dhe Shkencës ka komunikuar publikisht vendimin e marrë në akord me Rektoratin e universitetit Bujqësor të Kamzës lidhur me pranimin në nivelin e Diplomave të Nivelit të Dytë të studentëve grevistë, gjë e cila i detyroi këta të fundit të dilnin nga greva 8-ditore.
n.e/NOA
