Tiranë, 16 nëntor, NOA - Komisioni Evropian do të vendosë një rekomandim në vitin 2010 për heqjen e vizave dhe mund të themi se Shqipëria ka një mundësi reale për ta përfituar sa më shpejt në kohë liberalizimin e një procesi të tillë.
Një fakt të tillë e ka deklaruar gjatë konferencës "Regjimi pa viza për Shqipërinë, hapat e fundit", ku është e ftuar edhe europarlamentarja Tanja Fajon, shefi i delegacionit të Komisionit Evropian në Tiranë, Helmut Lohan.
Sipas tij, heqja e vizave do të përbënte një moment historik pasi Shqipëria ka qenë e izoluar.
"Por hyrja në BE nënkupton konsolidimin e shtetit demokratik dhe të një shteti që mund të mbrojë shtetasit e tij. Dhe ka një keqkuptim me idenë e integrimit dhe atë të heqjes së vizave, e këto janë çështje që duhet të shihen me shumë vëmendje", shtoi më pas ai.
Më tej, Lohan tha se duhet të forcohet roli i ligjit dhe lufta ndaj krimit të organizuar si edhe forcimi i institucioneve të të drejtave të njeriut.
"Këto janë disa kritere që duhet të përmbushen për heqjen e vizave me BE-në dhe sot është e qartë se Shqipëria ka nisur formulimin e strategjisë dhe mund të themi se reformat janë implementuar", tha ai, duke pohuar më tej se shpreson në përmbylljen sa më parë të kushteve.
n.e/NOA
