Tiranë, 16 Nëntor NOA - Ministria e Punëve të Jashtme përshëndet përfundimin me sukses të raundit të parë të zgjedhjeve vendore në Kosovë, mbajtur më 15 nëntor 2009. Këto ishin zgjedhjet e para, pas shpalljes së pavarësisë së Kosovës, të cilat u organizuan dhe administruan tërësisht nga vetë institucionet e saj.
Si të tilla, ato janë zgjedhje historike, që dëshmuan se proçeset e nisura në Kosovë janë të pakthyeshme dhe se demokracia që po ndërtohet është funksionale.
Me këtë rast, Ministria e Punëve të Jashtme uron qytetarët e Kosovës, faktorin politik dhe institucionet vendore për pjekurinë dhe seriozitetin e treguar në organizimin dhe menaxhimin e suksesshëm të këtyre zgjedhjeve, për klimën paqësore në të cilën ato u zhvilluan, si dhe për rritjen e pjesëmarrjes së votuesve, përfshirë pakicat serbe.
Ministria e Punëve të Jashtme thotë se shpreh bindjen se Kosova e pavarur i ka të gjitha kapacitetet e duhura për t'u ballafaquar me sfidat e reja në rrugën e konsolidimit të shtetit dhe te institucioneve demokratike për realizmin e aspiratave të saj evropiane dhe euroatlantike.
f.sh/NOA
