Nga Blerina Ahmetaj
Tiranë, 5 Dhjetor NOA - I gjithë vendi do të përfshihet të dielën dhe të hënën nga një mot i ftohtë ku temperaturat në zonat malore do të zbresin nën zero gradë celsius.
I ftohti do të shtrihet në pothuajse gjithë qytetet e vendit ku temperaturat më të ulëta të mëngjesit pritet të regjistrohen në Bajram Curr, Kukës e Peshkopi, në Ersekë e Kolonjë me nga -4 grade celsius.
Edhe Tirana pritet të regjistrojë të hënën temperatura të ulëta, në mëngjes 5 gradë celsius dhe në drekë 16 gradë.
Metereologët e shërbimit meteorologjik Meteoalb, partnerë bashkëpunimi me agjencinë kombëtare të lajmeve NOA, evidentojnë se dita e diel do të dominohet nga moti i kthjellët dhe vranësira kalimtare në pjesën më të madhe të vendit.
Ndërsa të hënën, pjesa më e madhe e territorit shqiptar do të dominohet nga kthjellime dhe vranësira kalimtare, përjashtuar zonat malore ku vranësirat do të jenë më të dendura.
Në mbrëmje dhe gjatë natës pritet shtimi i vranësirave ku i gjithë territori do te mbulohet nga vranësirat.
b.a/NOA blerina.ahmetaj@noa.al
