Fier, 12 dhjetor, NOA - Pas një mungese prej dy ditësh për shkak të një defekti të rëndë në sistemin e tubacioneve, uji është rikthyer sërish në qytetin e Fierit. Lajmi konfirmohet nga burimet zyrtare të ministrisë së Punëve Publike dhe Transporteve, sipas të cilave stacioni i pompimit të ujit në këtë qytet ka filluar nga puna. "Më datë 10.12.2009, rreth orës 09:00, ka ndodhur një difekt i rëndë në tubacionin kryesor që furnizon me ujë qytetin e Fierit nga pus shpimet Kafaraj, si pasojë e të cilit nuk është bërë i mundur furnizimi me ujë i banorëve të qytetit të Fierit", bëri të ditur ministria.
Duke shtuar më tej se pas dy ditësh ndërprerje, autoritetet përkatëse kanë ndërhyrë duke riparuar defektin e krijuar duke iu rikthyer qytetarëve ujin e munguar.
Paraditja e sotme ishte shënuar edhe si afati konkret i furnizimit me ujë të banorëve të Fierit dhe zonës përreth, si pasojë e kohës së domosdoshme për testimin dhe presimin e rrjetit nga linja kryesore, depo dhe rrjetit shpërndarës.
n.e/NOA
