Prishtinë, 16 dhjetor, NOA - Tërheqja e trupave të KFOR-it nga Kosova do të nisë gjatë vitit të ardhshëm, duke lejuar që në shtetin e ri të Evropës të mbeten vetëm 10 mijë të tilla, duke u shoqëruar edhe me mbylljen e mjaft bazave ushtarake.
Kjo strategji u bë me dije nga vetë komandanti i forcave të përbashkëta të NATO-s në Napoli, admirali amerikan Mark Ficxherald, i cili është duke vizituar Prishtinën gjatë këtyre dy ditëve.
Duke e vlerësuar si të qetë dhe të qëndrueshme gjendjen e sigurisë në Kosovë, ai tha se pikërisht për këtë do të nisë edhe reduktimi i forcave të KFOR-it në këtë vend. Ndërkaq, në fjalën e tij ai përjashtoi çdo mundësi që ngritja e bazës ushtarake të Serbisë në afërsi të Bujanocit, e cila shihet si një kërcënim për Kosovën.
Gjithsesi, lidhur me reduktimin e mëtejshëm të trupave ushtarake, Ficxherlad, tha se një gjë e tillë do të varet nga gjendja e sigurisë në terren dhe vlerësimet e Komandës së NATO-s, në Bruksel.
Nga ana e tij, në takimet me përfaqësuesin e lartë të NATO-s, kryeministri kosovar Hashim Thaçi tha se reduktimi i trupave të KFOR-it, është tregues për gjendjen e qëndrueshme dhe të paqtë në Kosovë.
n.e/NOA
