Durrës, 18 janar NOA - Një sherr për motive të dobëta i ka kushtuar shtrenjtë një 19-vjeçareje e cila është rrëmbyer dhe më pas është dhunuar me shkop.
Ngjarja ndodhi dje në Durrës kur Leonard Kertusha, 32-vjeçe lindur e banues në lagjen Nr. 8 Durrës, ka marrë me forcë në autoveturën e tij tip-Benz me targa DR 9935 B një 19-vjeçare ku e ka çuar në fshatin Arapaj të Komunës Rrazhbull Durrës.
32-vjeçari e ka ndaluar makinën e tij në një zonë të pabanuar të fshatit Arapaj dhe më pas ka nxjerrë nga makinë 19-vjeçaren nga Durrësit të cilën e ka goditur me shkop në pjesë të ndryshme të trupit duke i shkaktuar plagë.
Policia e sinjalizuar për ngjarjen kreu veprimet e para hetimore dhe nisi hetimet për kapjen e autorit të dyshuar gjë e cila u bë e mundur gjatë orëve të vona të natës.
Në dëshminë e tij dhënë në polici, Kertusha ka deklaruar se kishte pasur një sherr me vajzën 19-vjeçare të cilën e kishte dhe në lagje.
Ajo e kish fyer dhe për këtë qëllim, 32-vjeçari vendosi t'i japë një mësim duke e rrëmbyer.
Burime nga policia thanë se ndaj Kertushës u mor masa e arrestit për veprën penale të "heqjes së paligjshme të lirisë shoqëruar me dhunë fizike".
k.k/NOA
