Korçë, 23 Janar NOA - Një banesë në Korçë, është vënë në shënjestër të një burri në moshë të thyer i cili është sulur ta plaçkisë atë por është dalluar nga zonja e shtëpisë që ka vënë alarmin duke kërkuar ndihmën e e fqinjëve dhe policisë.
Ngjarja ka ndodhur në lagjen nr 11 të qytetit juglindor, informon korrespondentja e agjencisë NOA dhe autor i dyshuar i ngjarjes është 64-vjeçari Lilo Skëndi, nga e njëjta zonë banimi.
Nga hetimet policore, doli se Skëndi, kishte hyrë ne orën 13.30 të një dite më parë në banesën e Marika Pojanit, një 74 vjeçare nga Vosokopoja e cila prej vitesh jeton në qytetin e Korçës.
Duket se Skëndi nuk ka qenë shumë i kujdesshëm në "procesin" e vjedhjes sepse në një moment është dalluar nga 74-vjeçarja e cila ka vënë alarmin dhe në pak çaste ai ia ka mbathur. Gjithsesi, policia arriti ta prangosë pak orë më vonë, pasi pronarja e banesës e kishte njohur në pamje hajdutin e moshuar.
a.f/NOA
