Tiranë, 9 Shkurt NOA - I dyshuari për vrasjen e 22-vjeçarit Albert Ndrecaj sot pasdite në qendër të qytezës së Kamzës, pranoi krimin pasi u arrestua nga policia duke deklaruar se viktima i ngacmonte motrën.
Burime policore që po hetojnë ngjarjen e sotme, i thanë agjencisë NOA se 18 vjeçari Bukurosh Muceku, i cili u arrestua sonte nën akuzën e vrasjes me thikë të 22-vjeçarit Albert Ndrecaj, ka debatuar me viktimën e tij për motive të dobëta.
I dyshuari pretendonte se Alberti ngacmonte motrën e Bukuroshit dhe kjo ishte konsideruar nga 18-vjeçari si e papranueshme ndaj sot në një lokal pranë Universitetit Bujqësor të Kamzës të dy janë përballur dhe ka nisur një debat i nxehtë.
Në një moment, adoleshenti i është sulur 22-vjeçarit duke i ngulur thikën dhe e plagosur rëndë atë.
I riu megjithëse u dërgua shpejt në Spitalin Ushtarak të Tiranës, ndërroi jetë për shkak të dëmtimit të organeve jetësore, i thanë mjekët agjencisë NOA.
Policia mundi të kryejë arrestimin e të dyshuarit vetëm pak pas vrasjes dhe tani pritet të vazhdojë hetimi i plotë për krimin e rëndë.
e.r/NOA
