Tiranë, 11 shkurt, NOA - Parlamenti është institucioni më i mirë për zgjidhjen e kontradiktave politike.
Një fakt të tillë e ka bërë me dijeni gjatë një fjale që mbajti para deputetëve të Kuvendit të Shqipërisë, kryeparlamentari i Malit të Zi, Ranko Krivokapiç.
Sipas tij, parlamenti është mënyra më e mirë për të zgjidhur konfliktet dhe është tempulli i demokracisë. Në këtë mënyrë, ai ka dalë në mbrojtje të idesë së kthimit të deputetëve socialistë sa më parë në Kuvend dhe dhënies fund të ngërçit politik i cili prej disa muajsh po ndrydh jetën politike shqiptare.
Nga ana tjetër, përfaqësuesi i lartë i legjislativit malazez bëri me dije se "shumë shpesh historitë e mëdha i bëjnë edhe popujt e vegjël", duke iu referuar dy vendeve tona.Sipas tij, është fakt se Mali i Zi dhe Shqipëria paraqesin një shembull bashkëpunimi dhe stabiliteti në rajonin e Ballkanit e më gjerë.
"Të dyja vendet do të bashkëpunojnë më tej edhe në kuadrin e anëtarësimit në Bashkimin Evropian. Ai do jetë në vazhdën e ruajtjes së tipareve tona", e përfundoi fjalën e tij, Ranko Krivokapiç.
n.e/NOA
