Tiranë, 8 mars, NOA Foto Update - Kryeprokurorja Ina Rama gjatë punës së saj është ndeshur me presione politike nga të dyja kahet.
Një gjë të tillë e ka deklaruar ambasadori amerikan, John Uithers, gjatë një takimi në prokurorinë e Tiranës, në të cilin ka marrë në konsideratë punën e kryer nga kryetarja e Prokurorisë së Përgjithshme.
"Ina Rama është ndeshur me presione politike dhe me kritika edhe pse ka bërë detyrën e saj", ka thënë përfaqësuesi i rëndësishëm i trupit diplomatik në Tiranë.
Konkretisht, ai ka përmendur pengesat që i janë shfaqur Ramës lidhur me imunitetin, duke i cilësuar pengesat në tërësi të shfaqura në punën e saj nga politika, "me qëllim për të anuar nga ana tjetër".
"Puna e prokurorit, nuk është e lehtë në asnjë vend dhe Ina Rama ka treguar se ka punuar me përkushtim", ka thënë ndër të tjera Uithers.
Më tej, ai cilësoi se kufta kundër korrupsionit është e vështirë, pasi pas tij fshihen paratë dhe kriminelët.
Kjo nuk është hera e parë që ambasadori amerikan e merr në mbrojtje punën e kryeprokurores Ina Rama, madje në një cilësim të hershëm ai e ka quajtur edhe "Silvia Konti shqiptare".
n.e/NOA
