Tiranë, 16 mars, NOA - Rivendosja e dialogut politik mes dy kampeve kryesore në vend paraqitet me një rëndësi të madhe, po ashtu edhe hyrja e opozitës në Kuvend, duke shpresuar se për komisionin hetimor parlamentar do të arrihet një marrëveshje mes palëve.
Një fakt të tillë e ka pohuar sot gjatë një takimi me presidentin Bamir Topi, i dërguari i posaçëm i OSBE-së, Konstantin Zhigalov, i cili ka vlerësuar ndër të tjera edhe rolin e tij në mbajtjen e tryezës politike mes mazhorancës dhe opozitës.
Nga ana e tij, presidenti Topi i shprehu Zhigalovit mirënjohjen për ndihmesën e vazhdueshme që OSBE-ja ka dhënë për forcimin e demokracisë shqiptare, ruajtjen dhe thellimin e vlerave demokratike të shoqërisë dhe respektimin e të drejtave të njeriut.
Më tej, gjatë bisedës të dy personalitetet diskutuan edhe për situatën në rajon, duke theksuar rolin pozitiv, konstruktiv e promotor të Shqipërisë për paqen dhe qëndrueshmërinë rajonale.
Presidenti Topi vuri në dukje edhe dëshirën dhe vullnetin e Shqipërisë për të marrë kryesinë e radhës së OSBE-së në vitin 2014, një ambicje e cila u mbështet edhe nga Zhigalov, i cili vlerësoi bashkëpunimin e frytshëm të vendit tonë me këtë organizatë dhe marrëdhëniet produktive dypalëshe mes Shqipërisë e Kazakistanit edhe në kuadrin e organizatave të tjera ndërkombëtare si NATO etj.
n.e/NOA
