Tiranë, 12 prill, NOA - Kryediplomati italian, Franko Fratini, do të mbërrijë sot në Shqipëri, në kuadrin e një vizite zyrtare.
Lajmi konfirmohet për agjencinë e Lajmeve NOA nga burimet zyrtare të ministrisë së Punëve të Jashtme, të cilat paraqesin gjithashtu edhe gjithë pikat e axhendës së kësaj vizite, me detajet dhe oraret e përcaktuara të takimeve që Fratini do të kryejë me autoritetet më të larta shqiptare.
Kështu, axhenda parashikon që ministri i Jashtëm italian të zhvillojë fillimisht një takim me homologun e tij shqiptar, Ilir Meta.
Më tej, takimet e tij do të vijojnë me kryeministrin Sali Berisha me të cilin do të japë dhe një konferencë për shtyp, ndërsa rreth orës 13:00 është parashikuar një takim përmbyllës i kësaj vizite me presidentin e Republikës, Bamir Topi.
Paraprakisht, bëhet me dijeni se procesi i liberalizimit të vizave dhe integrimi i Shqipërisë në Bashkimin Evropian, do të jenë çështje kryesore të axhendës së kryediplomatit italian, i cili njihet për mbështetjen e vazhdueshme që ka dhënë ndaj Shqipërisë në kuadrin e procesit të integrimit evropian.
n.e/NOA
