Bruksel, 14 prill, NOA - "Më shumë se 1200 ekspertë vendas dhe dhjetëra të huaj kanë prezantuar me anë të përgjigjeve të Pyetësorit, gjithçka që politika shqiptare ka bërë në vitet e fundit, gjithë universin e reformave të saj duke synuar integrimin evropian".
Me këto fjalë, kryeministri Berisha i është drejtuar komisionerit evropian për Zgjerim, Stefan Fule, gjatë një konference për shtyp, pasi i ka dorëzuar atij dokumentin e përgjigjeve të Pyetësorit me mbi 2800 pyetje drejtuar qeverisë shqiptare.
"Nuk ka asnjë vend tjetër që të ketë ndryshuar kaq shumë sa Shqipëria vitet e fundit, ndërsa sot kemi sjellë këto përgjigje me shpresën për një përgjigje sa më pozitive nga ana e Komisionit Evropian", tha ndër të tjera kreu i qeverisë.
Sipas Berishës, ky është momenti i nisjes së një sfide të re e fillimi të ri, "dhe jam i sigurt se në muajt që do të vijnë ne do bëjmë çdo gjë është e mundur që të marrim përgjigje pozitive për çka kemi bërë deri tani nga strukturat evropiane".
n.e/NOA
