Matura- Nxënësit Njihen Me Shpjeguesin E Provimeve Me Zgjedhje
TIRANË, 6 Maj/ATSH/.-Maturantët, pasi u njohën me programet orientuese për provimet e Maturës Shtetërore, do te kenë mundësi sot të marrin të plotë shpjeguesin e këtij programi, që përmban modele pyetjesh të provimeve me zgjedhje.
Ministria e Arsimit dhe Shkencës publikoi paketën e dytë të Shpjeguesit të Programit të Orientuar të provimeve me zgjedhje të Maturës Shtetërore për 12 lëndë.
Shkollat tashmë janë njohur me programet orientuese dhe ky material sintetik dhe i ilustruar ka shembuj për çdo linjë dhe nënlinjë, duke krijuar modele të pyetjeve që do të jenë në testet e provimeve me zgjedhje të Maturës Shtetërore.
Paketa e këtij Shpjeguesi, i publikuar në në web-site e ministrisë, përmban tabela të ndërtimit të testit për çdo profil shkolle.
Ky program është përgatitur nga Agjencia e Vlerësimit të Arritjeve (AVA), është konsultuar me ekspertë të këtyre profileve dhe është një përvojë e parë në ndihmë të maturantëve./e.gj/s.s./
