Haraçinë, 7 maj, NOA - Depoja e cila ishte një problem i madh për banorët e Haraçinës me vite të tëra, filloi të pastrohet.
“Depoja është mjaft e rrezikshme për jetën e banorëve të Haraçinës dhe fshatrave përreth, pasi në të bëhet hedhja e mbeturinave të ndryshme. Edhe pse shumë herë kemi kërkuar që e njëjta depo të pastrohet, çdo herë kemi hasur në vesh të shurdhër. Tani filluam me mundësitë tona ta pastrojmë që të mos jetë pengesë për përhapjen e sëmundjeve të ndryshme”, thuhet në deklaratën përkatëse për shtyp mbi këtë aksion.
Më tej, zyrtarët e komunës së Haraçinës u bëjnë apel gjithë banorëve të saj si edhe fshatrave përreth, që të kenë shumë kujdes ku bëjnë hedhjen e mbeturinave sepse kjo është në dëm të tyre.
“Edhe në te ardhmen do të vazhdojmë që të kontribojmë për të përmirësuar mjedisin jetësor për banorët e Haraçinës”, theksoi Bastri Bajrami, kryetar i kësaj komune lidhur me një fakt të tillë.
