Protestat/ Papa: Kreu I Ps-Së Kërkon Pushtet Me Dhunë
TIRANE, 13 Maj/ATSH-Deputeti i Partisë Demokratike, Gjergji Papa akuzoi sot lidershipin e Partisë Socialiste se kërkon të marrë pushtetin me dhunë.
Në një reagim për zhvillimet e fundit politike në vend, ku Partia Socialiste ka përshkallëzuar protestat e saj për transparencën e zgjedhjeve parlamentare të 2009, deputeti Papa tha për mediat se, "bllokmenët e rinj e të vjetër: Edvin Kristaq Rama, Gramoz Ruçi, Ilir Xhelil Gjoni, Dash Myslim Peza kërkojnë pushtet me dhunë".
"Rama refuzon dialogun që Evropa i kërkon", tha Papa duke e akuzuar se, "po kërkon pushtet me bllokim rrugësh, me përplasje, synon pushtetin përmes konfliktit".
Deputeti i Partisë Demokratike, Gjergji Papa, duke shprehur kundërshtimin për linjën që po ndjek lidershipi i Partisë Socialiste, i kujtoi atij se, "zgjedhjet bëhen 1 herë në 4 vjet"./a.m//n.m/.
