Serbi - Një I Kërkuar Për Krime Lufte Arrestohet Në Australi
BEOGRAD, 12 maj /ATSH-ANSA/ - Dragan Vasiljkovic (55 vjeç), një ish-paraushtarak serb i akuzuar nga Kroacia për krime lufte, është arrestuar sot në Australi.
Siç njoftojnë mediat serbe, Dragan Vasiljkovic, i cili kërkohej për krime të kryera në qytetet Knin dhe Glina në vitin 1991, ishte arratisur më 30 mars pas vendimit të drejtësisë australiane për ekstradimin e tij në Kroaci.
Kënaqësi për kapjen e Vasiljkovic është shprehur nga presidenti kroat Ivo Josipoviç, i cili garantoi se për të do të zhvillohet një proces gjyqësor i drejtë.
Dragan Vasiljkovic gëzon edhe nënshtetësinë australiane dhe jeton prej kohësh në Australi, ku u arrestua në vitin 2006. Pas refuzimit të kërkesës së parë për ekstradim, ai u lirua në shtatorin e vitit 2009. Megjithatë më 30 mars të këtij viti, Gjykata e Lartë australiane e pranoi kërkesën e Kroacisë për ekstradim, por Vasiljkovic ishte zhdukur.
/e.v/
