Prishtinë, 26 Maj, NOA - Kryetari i komisionit parlamentar kosovar për Punë të Brendshme dhe Siguri, i shoqëruar edhe nga anëtarë të tjerë të tij, u takua sot me drejtorin e Përgjithshëm të Policisë së Kosovës, Behar Selimin.
Ai shprehu rëndësinë e ndryshimeve të fundit dhe atë jo vetëm në polici por edhe në ministrinë e Punëve të Brendshme, duke theksuar se është duke ndjekur nga afër zhvillimet e fundit dhe për reformat që tashmë kanë filluar në polici:
“Jam i kënaqur që ke gjetur rrugë për funksionim më të mirë të policisë, reformat që ke filluar duhet të jenë të dukshme për ne dhe për qytetarët”, - theksoi kryetari i këtij komisioni.
Nga ana e tij, drejtori i përgjithshëm i Policisë tha se reformat e ndërmarra prej këtij institucioni do të shkojnë në dobi të sigurisë së Kosovës dhe qytetarëve të saj.
“Menaxhimi i ri policor nënkupton që zyrtarët policorë do të jenë më afër qytetarit dhe atë me një qasje pro-aktive në funksion të parandalimit të krimit. Krahas kësaj kam vërejtur se deri tani ka munguar vendim marrja te eprorët e policisë, andaj, unë u kam dërguar një letër të hapur atyre duke vënë në funksion menaxhimin sipas objektivave dhe pres rezultate konkrete nga ata”, - theksoi Selimi duke shtuar se ai është duke mbikëqyrur në baza ditore zbatimin e mesazhit dhe çdo epror policor do të vlerësohet në bazë të rezultateve të punës dhe mënyrës së shfrytëzimit të burimeve.
n.e/NOA
