Gjirokastër, 31 Maj, NOA – Në të shkuarën dënimi me varje në litar kishte për qëllim të të bënte shembull për të tjerët, të të turpëronte në publik, për gjithçka të shëmtuar apo të paligjshme të kryer ndaj shoqërisë.
Një mënyrë pse jo për të dënuar kundërshtarët, por edhe për t’i dhënë fund dhimbjes duke u vetëvarur.
Sofia Asqeri, është një nga viktimat e kësaj të fundit, vetvarjes.
52 vjeçarja që jetonte e martuar në lagjen Manalat të Gjirokastrës vuante prej disa kohësh nga depresioni dhe sot në mëngjes ajo i dha një zgjidhje vuajtjes së saj, me vetëvarje në litar.
Sipas burimeve për agjencinë NOA, nga Policia e qarkut, një telefonatë e mbërritur nga vendngjarja në polici rreth orës 9.30 të mëngjesit ku njoftohej se ishte vetëvarur një shtetase, ka nisur menjëherë policinë drejt lagjes Manalat, ku në katin e dytë të shtëpisë së saj u gjet e varur në litar Sofia Asqeri.
Grupi hetimor pasi ka këqyrur kufomën e të ndjerës nuk konstatoi shenja dhune në trupin e saj.
Nga ekspertiza e mjeko –ligjore dhe nga deklaratat e të afërmve të Sofia Asqeriut rezultoi se ajo u vetëvar si pasojë e depresionit psikik, nga i cili vuante prej disa kohësh.
Viktima u gjet e varur nga bashkëshorti dhe daja i saj, të cilëve u është dashur të ngjiten nga dritarja për të arritur ndoshta ta shpëtonin, pasi viktima ishte mbyllur me çelës nga brenda.
Është Prokuroria e Gjirokastrës që ka marrë tashmë në dorëzim dokumentacionin e mbledhur në vendngjarje, pas këtij akti të rëndë, të ardhur prej depresionit, që po vërehet si një zgjidhje e mundshme për t’i dhënë fund dhimbjes, apo problemeve të jetës, një fenomen që nuk mund të lërë në heshtje shoqërinë.
mit/NOA