Lindje E Mesme - Flotilja/ Turqia Okb-Së: Izraeli E Humbi Legjitimitetin
NJU JORK, 31 maj /ATSH-ANSA/ - Izraeli "e ka humbur legjitimitetin me sulmin kundër flotiljes me ndihma për Rripin e Gazës", deklaroi sot ministri i Jashtëm turk, Ahmet Davutoglu, gjatë fjalimit të tij në Këshillin e Sigurimit të OKB-së.
"Një akt barbar, një vrasje shtetërore", me këto shprehje shefi i diplomacisë turke, në një fjalim të fortë, dënoi aktin e shtetit hebraik.
Ministri i Jashtëm shtoi se "flotilja përbëhej nga eksponentë nga më shumë se tridhjetë vende, të gjithë civilë, dhe me besime të ndryshme: të krishterë, myslimanë dhe hebraikë".
Davutoglu e vazhdoi fjalimin e tij duke shpjeguar se anijet "po transportonin material për ndërtimin e parqeve të lojërave për fëmijët, materialin e nevojshëm për shkollimin e tyre, ushqime dhe medikamente".
Shefi i diplomacisë turke i kërkoi Këshillit të Sigurimit "një hetim urgjent për ngjarjen e sotme, hetim që duhet të nis menjëherë".
/e.v/
