Durrës, 7 qershor, NOA – Një person ka marrë vendimin ekstrem për të vrarë veten pasi nuk ishte të gjendje të kthente borxhin e lekëve që kishte marrë. Për këtë qëllim ai ka zgjedhur të pijë një sasi fostoksinë nga e cila ka gjetur më pas vdekje.
Ngjarja ka ndodhur në qytetin e Durrësit, mesditën e djeshme dhe personi që ka vrarë veten quhet, Athanas Prosi, 50 vjeç. Prosi banonte në Tiranë dhe ai është gjetur pa ndjenja ditën e djeshme në qytetin bregdetar në katin e parë të një pallati në lagjen Nr. 13.
Kalimtarët e rastit kanë njoftuar policinë e cila e ka transportuar atë në mënyrë urgjente në Spitalin e qytetit të Durrësit.
Policia sqaron se në momentin e transportimit të tij drejt shërbimit spitalor ka qenë ende gjallë, por më pas ka gjetur vdekjen.
“Nga kryerja e veprimeve te para hetimore rezultoi se shtetasi në fjalë, duke qënë nën efektet e depresionit nervor, pasi ka pasur një sasi lekësh borxh, ka përdorur një sasi helmi fostoksinë duke i dhënë fund jetës”, thuhet në njoftimin e Policisë së Durrësit.
Policia ka ushtruar kontroll dhe në banesën e tij, ku është gjetur dhe një letër që ja dërgonte familjes. Sipas njoftimit të policisë në letër Prosi u kërkonte falje familjarëve për veprimin që po kryente.
m.xh/NOA
