Tiranë, 23 qershor 2010 NOA – “Sali Berisha ëndërron të konkurrojë vetëm në zgjedhjet e ardhshme dhe për këtë angazhon gjithë altoparlantët e tij që të thonë se ne do i bojkotojmë zgjedhjet”.
Ky ishte qëndrimi i dhënë sot nga Partia Socialiste e cila reagoi lidhur me deklaratën e Kryetarit të Grupit Parlamentar të Partisë Demokratike, Astrit Patozi, i cili tha sot se bojkoti i zgjedhjeve nga Partia Socialiste është një ogur i keq dhe lajm i keq për vendin dhe opozitën shqiptare.
Deputetja socialiste Ermonela Felaj sqaroi se zgjedhjet e ardhshme nuk do të bojkotohen nga forca kryesore e opozitës dhe theksoi se edhe kreu i mazhorancës e ka të qartë këtë:
“Edhe vetë Saliu e kupton se kjo është një ëndërr me sy hapur dhe opozitën do e ketë përballë në çdo betejë! As që bëhet fjalë të tërhiqemi nga rruga jonë për një Shqipëri me zgjedhje të lira, shtet ligjor dhe ekonomi të çliruar nga kthetrat e interesave të familjes në pushtet”, - përfundoi Felaj.
r.n/NOA
