Tiranë, 24 Qershor 2010 NOA - Zv. Kryeministri dhe Ministri i Punëve të Jashtme, z. Ilir Meta priti Europarlamentarin dhe Kryetarin e Grupit të Partive Popullore në Parlamentin Evropian, z. Joseph Daul.
Gjatë takimit u diskutua mbi proceset e liberalizimit të vizave dhe integrimit evropian të Shqipërisë, angazhimin e Parlamentit Evropian në mbështetje të Shqipërisë, ecurinë e reformave të ndërmarra nga Qeveria shqiptare si dhe mbi zhvillimet në rajon.
Z. Meta e falënderoi z. Daul për përkrahjen e vazhdueshme të Parlamentit Evropian ndaj procesit të integrimit evropian të Shqipërisë. Gjithashtu ai shprehu vlerësimin për përkrahjen unanime të Komisionit të Jashtëm të PE për liberalizimin e vizave për Shqipërinë brenda vitit 2010 dhe për angazhimin e shprehur ndaj integrimit të Shqipërisë në Bashkimin Evropian.
Z. Meta vlerësoi gjithashtu përpjekjet e z. Daul dhe z. Shulz për të kontribuar për përmirësimin e klimës politike në vend, në dobi të reformave të ndërmarra për integrimin evropian të Shqipërisë.
Në këtë kuadër, z. Meta e garantoi z. Daul për vendosmërinë e palëkundur të Qeverisë shqiptare për forcimin e institucioneve të zbatimit të ligjit, veçanërisht në drejtim të luftës kundër krimit të organizuar, trafiqeve, menaxhimit të integruar të kufijve dhe ligjit Anti-Mafia.
Nga ana e tij, z. Daul konfirmoi vendosmërinë e Parlamentit Evropian për të mbështetur proceset integruese të Shqipërisë dhe theksoi rëndësinë e angazhimit në dobi të përmbushjes së reformave integruese, si nga Qeveria, ashtu edhe nga opozita.
Lidhur me zhvillimet rajonale, z. Daul shprehu vlerësimin e veçantë për angazhimin konstruktiv të Shqipërisë për rritjen e bashkëpunimit me të gjithë vendet e Ballkanit Perëndimor në dobi të stabilitetit rajonal.
r.n/NOA
