Korçë: Deshton Mbledhja E Keshillit Bashkiak
KORÇË, 26 qershor / ATSH, Behar Fejzulla/- Këshilli Bashkiak i Korçës nuk arriti të miratonte dje çështjet e rendit të ditës, me përjashtim të një pike të vetme, dhënien e ndihmës ekonomike për muajin qershor.
Shkak u bë futja në rendin e ditës nga këshilltarët e djathtë të një pike për zevëndësimin e një anëtari të KRT-së të Bashkisë, që nuk u pranua nga të majtët, që braktisën më pas, mbledhjen.
Por mosmarrëveshja mes dy grupeve u shpalos në një debat mes kryetarit të Bashkisë, Niko Peleshi dhe kryetarit të grupit të këshilltarëve të djathtë, Pëllumb Beqiri mbi mosmiratimin nga këshilltarët e djathtë në mbledhjen e mëparëshme të projektit të Bashkisë për planin rregullues të qendrës së qytetit të Korçës, pa marrë më parë miratimin e KRTSH-së.
Pas kësaj, bashkia në shenjë hakmarrjeje, penalizoi firmën ndërtuese të unazës së qytetit të Korçës me 5 milion lekë gjobë dhe ndaloi punimet, me pretendimin se investitori, që është Drejtoria e Përgjithshme e Rrugëve nuk kishte marrë lejë në bashki dhe nuk kishte paguar taksën e ndikimit mjedisor./n.m/
