Perika Gjezi I Ka Falur Teatrit Dhe Kinematografise Role Te Spikatura
Kryeministri Berisha i dërgoi sot një mesazh ngushëllimi familjarëve të Perika Gjezit-
TIRANE, 28 Qershor/ATSH/.- Kryeministri Sali Berisha i dërgoi sot një mesazh ngushëllimi familjarëve të Perika Gjezit, i cili u nda dje nga jeta pas një aksidenti automobilistik.
Duke iu drejtuar familjarëve së të ndjerit Gjezi, Kryeministri e konsideron një humbje të madhe largimin e tij nga jeta. "Ndihem thellësisht i prekur dhe i hidhëruar nga lajmi për ndarjen e parakohshme nga jeta të njeriut tuaj më të dashur, të aktorit që me interpretimin dhe talentin e tij i ka falur teatrit dhe kinematografisë shqiptare shumë role të spikatura që do të mbeten në kujtesën e të gjithë shqiptarëve dhe në fondin e vyer të kinematografisë shqiptare", thuhet në mesazhin e Kryeministrit.
Perika Gjezi, thuhet në mesazhin e Kryeministrit, përmes roleve të interpretuara me mjeshtëri prej tij, në disa nga filmat më të bukur shqiptarë, do të mbetet në zemrën dhe mendjen e Korçës së tij të dashur ku u lind, u rrit dhe u shkollua, duke u mëkuar me pasionin dhe dashurinë për këtë art fisnik, si dhe do të mbetet i pashlyer në zemrën dhe mendjen e të gjithë artdashësve shqiptarë.
Aktori Perika Gjezi i teatrit "Andon Zako Çajupi" të Korçës humbi jetën dje pasdite në një aksident automobilistik në rrugën Korçë-Voskopojë. Perika Gjezi ka lindur në vitin 1949 në qytetin e Korçës. Ai ka përfunduar studimet e larta për art dramatik në Institutin e Lartë të Arteve në Tiranë në vitin 1975, kohë prej së cilës ka punuar si aktor i teatrit "A.Z.Çajupi" të Korçës. Gjezi ka luajtur mjaft role të spikatura në teatrin e Korçës dhe në kinematografinë shqiptare. /a.gjonaj//a.ke/
