Tiranë, 30 qershor, NOA, Milena Selimi - Gara e Miseve shqiptare përfundimisht do të jetë më 1 Korrik në kalanë e Gjirokastrës.
Në përfundim të seleksionimeve u kualifikuan 33 bukuroshe, që do të konkurojnë në edicionin e 12-të të konkursit "Miss Shqipëria".
Sot, merr fund përgatitja e tyre dhe nesër ato do të ngjiten në kalanë e Gjirokastrës për spektaklin e madh që do të mbahet në mbrëmje.
Skena rrethore me tapet druri në kalanë e Gjirokastrës, qytetit të gurtë, në jug të vendit, siç shprehet producenti i spektaklit Petri Bozo, është një dhuratë që nuk gjendet në asnjë kala tjetër të Shqipërisë.
"Më mirë vonë se kurrë!”, thotë Bozo, duke nënkuptuar se kalaja e Gjirokastrës ishte “piketuar” vite më parë, por mungonte infrastruktura hoteliere, që sot i gjen me bollëk.
Në fazën e parë të seleksionimit, kanë marrë pjesë 452 vajza, një shifër rekord për historinë e këtij spektakli.
"Gjatë fazës së seleksionimit janë përzgjedhur vetëm 33 vajza", thotë Bozo, ndërsa nënvizon se vetëm njëra prej tyre do të kurorëzohet mbretëresha e bukurisë shqiptare dhe do të marrë pjesë direkt në konkursin ndërkombëtar “Miss Globe International 2010”.
m.s/NOA
