Sport-Botëror/ Amerika Jugore, Kontinenti Dominues Në Botërorin Afrikan
- Katër nga tetë ekipet e kualifikuara për në çerekfinalet e Kupës së Botës janë nga Amerika e Jugut -
TIRANË, 1 Korrik /ATSH- Gjergji Mima/ - Brazilit dhe Argjentinës i janë bashkuar edhe Uruguaji dhe Paraguaji në fazën finale të Kampionatit Botëror "Afrika e Jugut 2010". Europianët konkurojnë në tetëshe me Gjermaninë, Holandën dhe Spanjën. Afrika përfaqësohet me Ganën. Po ku qëndron sekreti amerikanojugor i suksesit në futboll?
Trajneri i Paraguajit e pranon se lokomotivat e futbollit të Amerikës së Jugut janë Argjentina dhe Brazili, por ai nuk i përjashton shanset e ecjes më tej të ekipit të tij dhe Uruguajit.
Kualifikimi i ekipeve nga dy vende relativisht të vogla të Amerikës së Jugut ka qenë një nga të papriturat e Botërorit 2010.
Si shpjegohet ndriçimi kaq i fortë i amerikano-latinëve në Afrikën e Jugut? Kushdo pret që Brazili dhe Argjentina të paraqiten mirë në një ngjarje të tillë të madhe sportive si Kupa e Botës. Shumica e lojtarëve të përfaqësueses braziliane dhe argjentinase luajnë në Europë në kampionate me nivel të lartë futbolli.
Në gara të tilla, jashtë kontinentit amerikan, po shtohet përditë e më shumë edhe numri i futbollistëve nga vende të tjera të Amerikës së Jugut.
15 nga 23 futbollistët e grumbulluar nga Uruguaji në Botërorin 2010 luajnë në Europë. Nëntë lojtarë të Paraguajit luajnë për klube europiane.
Në botërorët e mëparshëm, të dy ekipet janë kritikuar për mbylljen në mbrojtje, por në Afrikën e Jugut ata kanë nxjerrë në pah një karakter më sulmues.
Një tjetër arsye për suksesin e pjesëmarrësve nga Amerika e Jugut ka të bëjë me sezonin e gjatë e të fortë të ndeshjeve kualifikuese, gjatë të cilit të gjitha përfaqësueset e kontinentit përballen më njëra-tjetrën nga dy herë./s.s./
