Lsi: Bashkepunimi Qeverises Pd-Lsi, Rezultoi Koalicioni I Integrimit Europian
TIRANE, 5 Korrik / ATSH- A.Gegvataj/ - "Për shkak të angazhimit dhe kontributit qeverisës të LSI-së, qeverisja e vendit ka shkuar më pranë qytetarëve, duke fituar dimension më njerëzor e human, çfarë është edhe në themelet e platformës tonë politike dhe qeverisës, apo Planit të Veprimit", u shpreh sot, një vit pas punës së nisur nga koalicioni PD-LSI, sekretari i pergjithshëm i LSI-së, Luan Rama.
"Kemi dëshmuar që angazhimet tona kanë qenë në të mirë dhe shërbim të vendit të lidhura me një sërë reformash të rëndësishme për standardet e qeverisjes", tha ai.
"Ne jo vetëm lexuam me shumë realizëm dhe përgjegjshmëri votën, që qytetarët shqiptarë dhanë në zgjedhjet e 2009-tës, por edhe iu përgjigjëm me përgjegjshmëri politike, qytetare dhe atdhetare mesazhin e atij votimi, që imponoi krijimin këtij koalicioni të bashkëqeverisjes, që rezulton Koalicioni i Integrimit Evropian të Shqipërisë", nënvizoi Rama.
Në emër të LSI-së, Luan Rama ftoi opozitën, që angazhimet e veta t'i shohë në fokusin e zhvillimeve dhe interesave europiane të Shqipërisë.
"PS të angazhohet në mënyrë produktive dhe të përmbushë misionin e saj si opozitë e një vendi demokratik evropian, si një opozitë evropiane dhe të jetë pjesëmarrëse dhe kontributore në tërë këtë proces", shtoi ai.
Duke shprehur besimin se vetëdija politike dhe atdhetare e socialistëve do ta bindë lidershipin e vet të orientohet në këtë kah evropian të zhvillimeve të vendit, Luan Rama shprehu besimin se "PS do të gjejë rrugën e duhur për të qenë edhe ajo njëra nga kontributoret e rëndësishme për Shqipërinë Europiane"./n.m/
