Havana, 8 Korrik, NOA – Njihet nga të gjithë si një vend i cili jo vetëm që nuk lëshon pe ndaj disidentëve, por i ndëshkon rëndë ata edhe për gjestin më të vogël të shfaqur kundër pushtetit.
E megjithatë, edhe Kuba duket se po ndryshon kohët e fundit, ndërsa prej saj vjen një lajm i çuditshëm se do të lirohen 52 të burgosur politikë.
Kështu, lajmi i bërë me dije nga kisha katolike e vendit, tregon sesi pas një takimi mes presidentit Raul Castro dhe kryepeshkopit të Havanës, kardinalit Jaime Ortega, u ra dakord që të lirohen disa të burgosur.
Por ajo që i çuditi të gjithë ishte negociata për një numër kaq të lartë të tyre që aktualisht mbahen të burgosur në burgjet e Havanës.
Ndërkaq, bëhet me dije, se në këtë takim negociues, ka qenë i pranishëm edhe ministri i Jashtëm spanjoll, Miguel Moratinos, prania e të cilit duket se ka ndikuar në marrjen e një mase të rillë liberale për një shtet me kufizime si Kuba.
Thuhet që pesë të burgosurit e parë do të lirohen pas disa orësh, të tjerët në tre deri katër muajt e ardhshëm, ndërsa u është dhënë leje për largim nga Kuba.
Të burgosurit i përkasin një grupi prej 75 kundërshtarësh të qeverisë, të cilët ishin dënuar në mars të vitit 2003, ndërsa lajmi për lirimin e tyre është mirëpritur nga aktivistët kubanezë për të drejtat e njeriut.
n.e/NOA
