Burimet nga Qeveria bënë të ditur për agjencinë NOA se Juela Meçani largohet nga detyra e zëdhënëses, por një detyrë tjetër të rëndësishme pritet që ajo të marrë në muajin shtator
Tiranë, 15 Korrik 2010 NOA/ Eglantina Nasi – Juela Meçani nuk do të jetë më zëdhënëse e Kryeministrit të Shqipërisë. Lajmi konfirmohet për agjencinë NOA nga burime zyrtare në kabinetin qeveritar.
Duke nisur nga dita e sotme 15 korrik 2010, zëdhënëse e Kryeministrit Sali Berisha do të jetë Erla Mëhilli, deri dje, zëdhënëse e Partisë Demokratike dhe më herët, zëdhënëse e Ministrisë së Transporteve. Burimet nga qeveria bënë të ditur për agjencinë NOA se Juela Meçani largohet nga detyra e zëdhënëses, por një detyrë tjetër të rëndësishme pritet që ajo të marrë në muajin shtator.Juela Meçani, e zgjedhur si Miss Fotozhenia në spektaklin Miss Albania 1994, ishte në Itali familjarisht kur u tërhoq nga kryeministri Berisha që i kërkoi të ishte ajo imazhi i shefit të Qeverisë.
Për mbi tre vjet, Juela Meçani ishte zëdhënëse e Kryeministrit, një detyrë kjo goxha e vështirë, nisur nga intensiteti shumë i lartë i axhendës së përditshme të Berishës.
Si Meçani dhe Mëhilli, u zgjodhën në mbledhjen e 19 dhjetorit të kaluar, anëtare të Këshillit Kombëtar të Partisë Demokratike.
r.n/NOA
