Vlore: Sistem Vrojtim-Sinjalizimi Per Mbrojtjen E Pyjeve Nga Zjarret
VLORE, 14 korrik/ATSH-H.Koçi/.- Një shërbim i posaçëm vrojtim-sinjalizimi për mbrojtjen e pyjeve nga zjarret gjatë sezonit veror është organizuar nga ndërmarrja e Shërbimit Pyjor në Qarkun e Vlorës në të gjithë teritorin e tij.
Drejtori i ndërmarrjes, Bujar Karçanaj tha sot për ATSH-në se, "sistemi i vrojtim-sinjalizimit funksionon në të gjithë territorin, ku pjesë e tij janë dhe strukturat e ngritura në të gjitha fshatrat, komunat, etj".
Sipas tij, përmes sistemit, brenda një kohe relativisht të shkurtër përcillen çdo rast i mundshëm i shfaqjes së zjarreve, ndërsa në strukturat përfshihen edhe kryepleqtë e fshatrave, që kanë kompetenca të caktuara në strukturat e ngritura nga Ndërmarrja e Shërbimit Pyjor, ndërsa janë vënë në dispozicion numra celularësh pa pagesë.
Prioritet mbetet Parku Kombëtar i Llogorasë dhe Pylli i Sodës në periferi të Vlorës, ku shërbimi është 24 orësh dhe numri i punonjësve i përfshirë në to është i mjaftueshëm për të vepruar në çdo rast të shfaqjes së mundshme të zjarreve.
Edhe sivjet, sikurse në vitet e tjera, janë nënshkruar marrëveshje me barinjtë e zonave të ndryshme, ku përcaktohen detyrimet dhe të drejtat reciproke për mbrojtjen e zonave të gjelbra nga zjarret.
Prej rreth 2 vjetësh, 50 përqind e sipërfaqes së pyjeve ka kaluar nën administrimin e njësive të qeverisjes vendore, fakt që po shoqërohet me përmirësim të situatës së shfaqjes së vatrave të zjarrit. Vitin e kaluar numri i tyre ishte 3 herë më i vogël krahasuar me vitet paraardhëse.
Fondi i pyjeve dhe kullotave në rrethin e Vlorës përbëhet nga rreth 73 mijë hektarë, nga të cilat 40 mijë hektarë janë kullota. /a.ke/
