Obama Dënon Atentatin E Tmerrshëm Kundër Një Xhamie Në Iran
UASHINGTON, 16 korrik /ATSH-AFP/ - Presidenti amerikan Barack Obama e dënoi ashpër sot atentatin e tmerrshëm kamikaz kundër një xhamie shiite që ndodhi dje në juglindje të Iranit dhe që shkaktoi 27 të vdekur.
"I dënoj me forcë atentatet e tmerrshme kundër një xhamie në jug të Iranit", deklaroi Obama në një komunikatë.
"Vrasja e civilëve të pafajshëm në një vend kulti është një krim i pafalshëm dhe ata që e kanë kryer duhet të përgjigjen", shtoi ai.
Atentati u mor përsipër nga grupi ekstremist sunit Jundallah, i cili u shpreh se donte të godiste Gardianët e Revolucionit, ushtria ideologjike e regjimit iranian.
Atentati, që shkaktoi edhe 250 të plagosur, ndodhi në xhaminë Jamia, në Zahedan, kryeqendra e provincës Sistan-Baluçistan, ku grupi Jundallah (ushtarët e Allahut) zhvillon që prej 10 vjetëve një kryengritje të armatosur.
/I.Pu.
