Sekuestrohet Në Linzë 9 Kg Kanabis Sativa, Në Kërkim 26 Vjeçari
TIRANË, 16 Korrik/ATSH/.-Një sasi prej 9 kg lëndë narkotike kanabis sativa, u sekuestrua dje në Linzë të Tiranës, në automjetin e një 26 vjeçari, i identifikuar si poseduesi i lëndës narkotike, person i shpallur në kërkim.
Sipas burimeve zyrtare të Policisë së Tiranës, sasia e drogës, që u gjet në automjetin tip "Benz", me targa LU 9473 B, ishte në pronësi të shtetasit Lulëzim Tabaku.
Materialet hetimore në ngarkim të 26 vjeçarit Tabaku, i kaluan Prokurorisë së Rrethit Gjyqësor të Tiranës për hetime të mëtejshme, ndërkohë që Policia po punon për arrestimin e autorit të ngjarjes.
Në prangat e Policisë, ka përfunduar mbrëmjen e së enjtes dhe shtetasi Sebastjan Gjoni, për të cilin Policia tha se dyshohet të ketë vjedhur një sasi të konsiderueshme karburanti në serbatoret e katër kamioneve të parkuar në një pikë shitjesh inertesh në pronësi të një shtetasi./m.sh/f.n/
