Strugë, 17 korrik, NOA - Në Strugë u hap mbrëmë edicioni i 19-të i Festivalit të këngëve dhe valleve popullore “Këngë Jeho”, me pjesëmarrjen e shoqërive dhe ansambleve artistike nga trevat shqiptare.
Dita e parë e festivalit filloi me parakalimin e shoqërive kulturore artistike nëpër sheshin e qytetit.
Gjatë tre mbrëmjeve të festivalit, në skenë do të ngjiten shumë ansamble artistikë nga Maqedonia, Kosova e Shqipëria si dhe solist të mirënjohur të krijmtarisë popullore mbarëshqiptare.
Natën e parë të festivalit, në skenë do të ngjiten grupet artistikë: “Sazet e Frëngovës”-Strugë, “Goca e Tivarit”-Gostivar, “Haki Stërmilli”-Dibër, “Jeta e Re”-Sllupçan-Kumanovë, “Migjeni”-Strugë dhe “Emin Duraku”-Shkup.
Në natën e dytë pjesëmarrëse në këtë festival janë grupet; “Burimet e Sharrit”-Tetovë, “Rrapsh”-Tuz-Mali i Zi, “Besa”- Gostivar, “Jahi Hasani”- Çegran dhe Ansambli i qytetit “Berati”-nga Berati-Shqipëri.
Nata e tretë dhe e fundit e këtij festivali është rezervuar për gupet artistike: “Besana”-Opojë-Kosovë, “Jehona” e Koroshishtë-Strugë, “Grupi Polifonik Fieri” - Shqipëri, “Shpresa” -Veleshtë-Strugë, “Valët e Liqenit”-Ladorishtë-Strugë dhe në përmbyllje, sërish “Ansambli i qytetit Berati” nga Berati-Shqipëri, me këngë qytetare.
Gjithashtu, në këtë festival, janë ftuar dhe kanë konfirmuar ardhjen edhe shumë solist të mirënjohur të skenës artistike të muzikës popullore mbarëshqiptare.
NOA/INA
