Prishtinë, 18 korrik, NOA – “Përgëzoj qeverinë për përkushtimin e saj ndaj decentralizimit, kandidatët në zgjedhje dhe më së shumti qytetarët që po e marrin të ardhmen në duart e tyre dhe po dalin në votime”.
Kështu është shprehur përfaqësuesi civil ndërkombëtar në Kosovë, Pieter Feith, duke iu referuar balotazhit në komunën e Parteshit.
“Kam besim se kjo do të hapë një kapitull të ri për qytetarët e Parteshit, të cilët tani e tutje do të kenë më tepër qasje në vendimmarrje për çështjet që kanë ndikim në jetën e tyre të përditshme”, ka thënë Feith lidhur me një fakt të tillë.
Duke shtuar se ky është një hap tjetër i rëndësishëm për implementimin e zotimeve të marra përmes Kushtetutës së Kosovës dhe Propozimit Gjithëpërfshirës të Statusit për të ndërtuar të ardhmen e Kosovës si një vend i lirë dhe demokratik, i cili do të jetë atdheu i të gjithë qytetarëve pavarësisht përkatësisë së tyre etnike.
n.e/NOA
