Shkoder: Zjarr Ne Barakat E Romeve, Zjarrfikesit Evitojne Djegien
SHKODËR, 19 Korrik/ATSH-G. Marku/- Një zjarr i papritur që ra në orët e mbrëmjes së sotme në hyrje të qytetit të Shkodrës, ka shkrumbuar një numër barakash, ku strehoheshin pjesëtarë të komunitetit rom, ndërsa ndërhyrja e menjëhershme e sherbimit të zjarrfikseve ndaloi përhapjen e tij në ndërtesat e tjera.
Burime zyrtare nga policia lokale dhe sektori i zjarrfikëve të prefekturës, thanë për ATSH-në se "nga zjarri i rënë në mënyrë të befasishme, janë djegur të paktën mbi 50 baraka prej dërrase, ku strehoheshin pjesëtarë të komunitetit rom".
Menjëherë në vendngjarje mbërritën forca të shumta policie dhe mjetet e zjarrfikëve, të cilat duke ndërhyrë me shpejtësi, lokalizuan vatrën e zjarrit, dhe më pas, shuarjen e tij të plotë.
Zjarri i shpejtë dhe i papritur, për të cilin hetimet paraprake të ekspertëve të policisë dhe zjarrfikësve dyshojnë se ka ardhur nga një shkëndijë elektrike, nuk u dha mundësi familjeve të barakave dhe çadrave, që u përfshinë nga zjarri, që të nxirrnin pajisjet.
Ndërhyrja në kohë e zjarrfikësve dhe ndalimi i zjarrit shpëtoi pjesën tjetër të rreth 50 barakave të tjera.
Në vendngjarje ishin edhe drejtuesit e lartë të qeverisjes vendore, të cilët pasi u takuan me pjesëtarët e komuniteti rom, premtuan se ti gjenden pranë duke i ndihmuar me veshje dhe ushqime, ndërsa po shikohet mundësia e sistemimit të tyre, fillimisht për fëmijët dhe gratë, dhe më pas edhe të tjerët në mjediset e konvikteve të qytetit./n.m/
