Nju Jork, 23 korrik 2010, NOA - Amerika është gjendur në shok pas lajmit kur një djalë 14 vjeçar ka kryer vetëvrasje duke prerë fytin e tij me një brisk, por më parë ai kishte kryer një masakër të tmerrshme në familjen e tij në rrethinat e Nju Jorkut: u ka prerë fytin dy motrave, 7 dhe 10 vjeç, ka vrarë nënën e tij 30 vjeçare dhe vëllanë 2 vjeç duke djegur dhe shtëpinë ku ndodheshin.
Ngjarja ka ndodhur në lagjen e varfër Staten Island, ku zjarrfikësit ishin thirrur për të ndërhyrë për të shuar flakët në një apartament (për momentin është menduar se kishte rënë zjarr). Pasi kanë hyrë në banesë për të shuar flakët e zjarrit zjarrfikësit kanë parë një skenë të tmerrshme: trupat e pajetë të dy vajzave 7 dhe 10 vjeç të shtrirë në dysheme me fyt të prerë, një fëmijë 2 vjeç ende gjallë, por i asfiksuar nga tymi (i cili vdiq gjatë rrugës për në spital); trupin e nënës në dhomën tjetër të vdekur. Së fundi, në një krevat, trupin e CJ Raymond, 14 vjeç, me një plagë të thellë në fyt, dhe një brisk të përgjakur në dorën e tij. Edhe pse ende nuk nuk është konfirmuar zyrtarisht, rindërtimi i ngjarjes dhënë nga hetuesit është: djali, i cili ishte raportuar kohët e fundit për dhunë, vendosi "t'i japë fund jetës" duke vrarë gjithë familjen e tij para se ti vërë zjarrin shtëpisë. Sipas dëshmive të fqinjëve, djali ishte raportuar kohët e fundit për incidente të dhunshme në shkollë, në pishinë dhe në rrugë, por askush nuk besonte se do të shkonte deri këtu. “Ai nuk ishte një fëmijë i keq", tha i habitur për “ New York Daily News fqinji i tij Shaquawna Meaders,- "E donte vëllanë dhe motrat e tij. Ai u kujdesej për to si një baba."
CJ ishte dëbuar, gjithashtu kohët e fundit nga shkolla pasi kishte kërcënuar drejtorin e shkollës. Nëna e tij, Leisa Jones, jetonte në këtë lagje të varfër bashkë me katër fëmijët. Ajo punonte me kohë të pjesshme si roje sigurie në një supermarket dhe frekuentonte një shkollë parukerie.
a.e./NOA