Venezuela Dhe Kolumbia Ndërpresin Marrëdhëniet Dipomatike
KARAKAS, 23 korrik /ATSH-MIA/ - Pas muajsh të tërë akuzash dhe kundërakuzash, Venezuela dhe Kolumbia ndërprenë marrëdhëniet diplomatike, njoftuan burime të ndryshme.
Tërheqja nga të gjitha raportet diplomatike mes dy vendeve amerikano-latine ka ardhur prej liderit të Karakasit, Hugo Chavez, i cili ka ndërmarrë hapin ekstrem pas asamblesë së jashtëzakonshme të Organizatës së Shteteve Amerikane.
"Jam i detyruar të njoftoj prishjen e marrëdhënieve me Bogotanë pas asamblesë së jashtëzakonshme të OSHA-s në Uashington, ku ambasadori kolumbian Luis Alfonso Hojos akuzoi se të paktën 1 500 guerilje të FARC-it strehohen në 87 zona në territorin venezuelian", tha në deklaratën e tij për mediat vendase presidenti Chavez.
Marrëdhëniet mes Kolumbisë dhe Venezuelës, që nga ardhja në pushtet e Chavezit kanë qënë të tensionuara.
Kolumbia akuzon fqinjën e saj për strehim dhe ndihmë materiale ndaj rebelëve të FARC-it, akuza këto që mohohen prej Venezuelës.
Uashingtoni e konsideroi vendimin e Chavezit si të nxituar dhe një mënyrë jo shumë të mirë reagimi./
a.jor.
