Prishtinë, 5 gusht, NOA – Dëshmorët, invalidët, veteranët e UÇK-së, viktimat e familjeve të tyre do të mbrohen në Kosovë me një ligj të ri, të miratuar së fundmi nga qeveria e Kosovës.
Pas miratimit të këtij projektligji që mbron statusin dhe të drejtat e dëshmorëve, kryeministri i Kosovës, Hashim Thaçi, tha se edhe pse ky projekligj ka kosto të lartë për buxhetin e Kosovës, ai theksoi se “nuk duhet harruar se dhe sakrificat për lirinë e Kosovës kanë qenë të mëdha”.
Në këtë projektligj thuhet se “statusi Dëshmor i Kombit u njihet edhe atyre veprimtarëve, të cilët kanë kontribuar për çështjen kombëtare, individualisht ose të organizuar në grup, dhe, që janë vrarë nga armiku, nga data 9 maj 1945 deri më 30 dhjetor të 1991-it”.
Ky projektligj tha Thaçi, njeh statusin e Komandantit Legjendar për Adem Jasharin, ndërsa familjes së tij në Prekaz të Skënderajt, i siguron të drejta dhe të ardhura, pikërisht të përcaktuara nga ky ligj.
Qeveria e Kosovës duket se do ta plotësojë këtë projektligj, që do të kalojë për miratim në Kuvendin e Kosovës edhe me akte të tjera.
mit/NOA